Бар асоси омори Додгоҳи олӣ, соли 2022 дар кишвар 85 нафар барои дузанагӣ ё зиндагӣ дар як вақт бо чанд ҳамсар ҷазо гирифтаанд. Соли 2021 бошад 82 нафарро барои ин кор ҷазо додаанд.
Ин дар ҳолест, ки солҳои қабл шумораи мардоне, ки барои зиндагии якҷоя бо чанд зан ҷазо гирифтаанд, аз сад нафар зиёдтар будааст.
Аз ҷумла, соли 2018 102, 2019 101 ва соли 2020 бошад 108 мардро барои дузанагӣ ҷазо додаанд.
Дар Тоҷикистон бисёрзанӣ манъ аст ва дар моддаи 170-уми Кодекси ҷиноӣ барои он ҷарима ё то 5 сол зиндон ҷазо муқаррар шудааст.
Аммо мақомот мегӯянд, бо вуҷуди манъ будани бисёрҳамсарӣ, ин падида дар ҷомеаи Тоҷикистон вуҷуд дорад.
Дар барномаи давлатии рушди оила, ки ҳукумат қабул кардааст, омада, ки дузанагӣ ё бисёрзанӣ яке аз сабабҳои муноқиша дар оилаҳо аст.
